قال رئيس التيار الوطني الحر النائب جبران باسيل: "القصّة صارت بنصّها، بتركها لأنّي جعت؟, ما بتسوى الدنيا الاّ ما كتب القصّة كلّها, قصتنا يا صبايا ويا شباب التيار، قصّة نضال ما بيوقف وقصّة حلم ما بيخلص".

وأضاف, "القصّة هي قصّة وطن وحلم انّو يكون حرّ محرّر، وفيه دولة قويّة اوّل انسان خبّرنا القصّة هو الجنرال عون بالـ 88، ومعه حلمنا فيها ومشينا الطريق، واليوم عم نخبّركم ياها نحنا واياه، وبكرا انتو بتخبّروها ليلّي بعدنا وبعدكم. والحلم ما بيخلص ولا بيشيخ!".

وتابع, "انا كل سنة كنت قول للجنرال بعيده: انت الحلم والحلم ما بيشيخ، ومرّة زدت وقلت له انت الكرامة والكرامة ما بتشيخ، (لأنّك كرامتنا)".

وأشار باسيل إلى أنه, "في السنة الماضية قلت له: "بالعمر صحيح بتكبر، بس بالكرامة بتبقى اكبر, بالقصر هيدي آخر سنة، بس بالوطن عمرك ما بيخلص, جنرال بعيدك الـ 87 بتبقى جبل والجبل ما بيشيخ, جنرال انت السنة عم تعيّد عيدك الـ 88 معنا، مع شباب التيار ولأنّك بعقلك شاب، اكتر منّا، قرّرت تعيّد معنا".

واستكمل, "مرّة قلت لنا "ويل لأمّة تضحّي بشبابها من أجل شيبها, ونحنا اليوم منقلّك "ويل لشعب يضحي بأوادمه من اجل سارقيه", وشباب التيار بعيدك بيقولوا لك: "الحلم ما بيشيخ، والكرامة ما بتشيخ وانت ما بتشيخ والتيار ما بيشيخ طالما بيحمل فكرك".

ولفت باسيل إلى أنَّ, "الحلم ما بيخلص، ولو اعتبر الانسان انه حققه، بيخلق حلم تاني بعده، والانسان يلّي بيوقف يحلم، بيموت بعقله وبروحه, ومن 78 منحلم بتحرير لبنان من اسرائيل وتحقّق الحلم بالـ 2000, ومن 88 حلمنا بتحرير لبنان من الوصاية السوري وتحقّق الحلم بال، 2005, وحلمنا بالحرية والسيادة والاستقلال وتحقّقوا – هل منحافظ عليهم او منخسرهم؟".

وقال: "بالـ 2005، حلمنا بالجنرال عون رئيس جمهورية وتحقّق الحلم بالـ 2016، انتخب بحريّة وبسيادة وباستقلال، لأنه رئيس لبناني، صنع في لبنان، وقوته من لبنان، وجذوره وفكره ومشروعه بس بلبنان – هل خلص الحلم؟ هل تحققت احلامنا؟ لا! لأن حلمنا الأساسي والكبير هو بناء الدولة – الحرية والسيادة والاستقلال ليكون عنّا دولة حرّة ومستقلّة وسيّدة، مش مزرعة أو ارض سايبة او مشاع. حلمنا بالرئاسة لتكون وسيلة لبناء الدولة الصالحة والقوية".

وأضاف, "الحلم ببناء الدولة ما بيتحقّق بسرعة والاّ بيكون وهم وساعتها الوهم سمّ. اذا كان حدا توّهم انو بالرئاسة رح نحقّق كل اهدافنا، بيكون الوهم آخره غصّة! وهيدي الغصة يلّي صابت اللبنانيين، لأن افتكروا انو مع الرئيس عون كلّه بيظبط! ويمكن الحق شوي علينا، لأن البعض افتكر هيك".

وتابع, "يمكن وهم نفكّر، انو كل الفاسدين رح يصيروا فرد مرّة بالحبس، خاصةً لمّا جمهور الفساد بيكون اكبر من جمهور الاصلاح, ويمكن الوهم نصدق انو الفاسدين بيصيروا قديسين, بس كمان استسلام وخنوع وضعف وفشل وكسل".

وأوضح باسيل, "اذا قبلنا فكرة انو ما فينا نعمل شي، ولا حرامي بيفوت على الحبس، وبإنو واحد متل رياض سلامة بيعمل كل يلّي عمله وما بيصير شي، ونحنا منصير من فرقة الزقيفة او القبيضة, الحلم انّو الاصلاح يقوى على الفساد، والاصلاحيين يحاسبوا الفاسدين، وهون الحلم ما بيوقف لأنه المعركة معركة الخير مع الشر ونحنا اهل الخير؛ وهون " الحلم بيكون قصّة بتسمّ لما بتقطشها بنصها".

وأوضح قائلًا: "نحنا ناس حلمنا ما بيوقف وما بيشيخ، وطالما عم نحلم، هو الحافز لشغلنا ونضالنا وتعبنا، رح ننتصر وينتصر الخير على الشر، والاصلاح على الفساد وواحد متل رياض سلامة رح يتحاسب, وإذا ما تحاسب واحد متله، ما بيقوم الوطن ويلّي بدّو دولة واصلاح، بدل ما يلّي عنده قوّة يستعملها على الغرب، يستعملها على رياض اسهل, وبدل ما الغرب يتمرجل علينا بالاصلاح، يوقف دعمه، هو وجماعته، لرياض".

وأشار إلى أنه, "بدّهم يعملوا اصلاح، بس بدّهم (يجتمعوا) ويجيبولنا رئيس جمهورية فاسد، ورئيس حكومة فاسد وحاكم مركزي افسد منهم وبحمايتهم؛ وبيزعلوا اذا قلنا لا! لا ومئة لا, وما حدا يهدّدنا بالفوضى او بعقوبات، او بالفراغ وبالحكومة وبمجلس النواب, ورئيس الجمهورية امّا منختاره بقناعتنا، وما حدا بيفرضه علينا، امّا الجمهورية ما بتقوم بهيك ناس".

وأضاف, "حلمنا بلبنان القوي وبالجمهورية القوية وبالدولة القوية ما بيوقف، وبدّنا نحقّقه طالما في شباب مثلكم بيكمّلوا النضال والحلم، وبيآمنوا بقضية وطن, والحلم بكل شي، بكل قطاع, وحلمنا نعمل قانون الغاز وعملناه حلمنا نعمل مراسيم وهيئة النفط وعملناهم حلمنا نلزّمه ولزّمناه حلمنا نرسّم الحدود وعملناها, بس ما بيكفي, اليوم عم نحلم باستخراجه، ورح نستخرجه وعم نحلم بصندوق سيادي لما يشفطوا الثروة ورح نعمله وبعدها منحلم بالطاقة المتجدّدة وبخطوط الغاز ومعامل التغويز منحلم، منشتغل ومنعملهم".

وتابع, "لمّا بيوقّفونا، وبيعرقلونا، او ما بيخلّونا، ما منوقف ومنفكّر اننا متوهمين ومنتسمّم لا!، هيدا مش وهم، منكمّل ومنناضل، ومنتحمّل عقوبات ومنقوم منها، ومنكمّل لنحقّق وننجز الحلم أو قسم منه، ومنضلّ نحلم. منتوهم اذا منفكّر اننا رح نعمل الدولة الفاضلة الميثالية الافلاطونية، بس مش حلم ابداً اننا نعمل دولة باصلاح مؤسساتها وماليتها واقتصادها".