كلوفيس شويفاتي:

اثناء جولة قام بها الاباتي بولس نعمان في ارض ايليج وكنت ارافقه مع الرفاق صعود وميشال متري وميشال عيد ومعنا سامي خويري والدكتور نبيل حكيم واخرين . قال لنا وهو يجول في غابة الارز حاملا اثقال سنواته ال٨٤ : رابطة سيدة ايليج عملكم عظيم تعيدون احياء تاريخ الاجداد والاباء وتاريخنا المسيحي بشكل رائع، هيدا الشغل ، الشواهد التاريخية ومنصة البطاركة والارز المزروع اللي بيخلد الشهداء والمحطات التاريخية شي بيكبر القلب"...

فقلنا له:" هذا التاريخ انتو صنعتوه يا سيدنا وما النا اي دور فيه..."
اجاب:" ولكن انتو عم بتعرفوا الناس عليه في هذا المكان المقدس ". وقال مبتسما:" هلق صار فيي موت ومطمن بالي ان في ناس وفية وعم بتظهر تاريخنا المهم والعظيم..."

اجبنا:" الله يطول بعمرك يا سيدنا بعدنا بحاجة الك ولامثالك ..".
-"بدي اسالكم بمحبة مين عم بيساعدكم تا تعملو كل هالشغل؟ لانو يا ولادي هيدا الشغل بيكلف "
-" سيدنا نحنا بنشتغل بفلس الارملة وسيدة ايليج بتساعد وبتسهل كل شي.." .
- السلام عا اسما انتو كم شخص بالرابطة ؟
- نحنا يا سيدنا ١٣٠ شخص من كل المناطق هودي اعضاء الرابطة ولكن عنا كتير كتير اصدقاء مش منتمين للرابطة اداريا ؟
ممتاز انتو اللي عم تعملو بدو امكانيات ؟
سيدنا هيدا اللي انعمل مش بين ليلي وضحاها هيدا الشغل النا عشرين سنة بنعملو.
- عشرين سنة؟ مدة مش قليلي
الله يعطيكم العافية وسيدة ايليج ترافقن واللي عم تعملو رح يبقى مخلد بتاريخ هالدير والموقع العظيم ...

وخلال جولته اقترب الاباتي من رفيقتا ايلي مراد على كرسيه وسلم عليه وقبله ، وعندما عرفناه ان ايلي كان الرئيس السابق للرابطة. سأله الاباتي : " وايمتا صار معك الحادث". فاخبرناه ان ايلي من مصابي الحرب في العام ١٩٧٩ وكان رئيسا للرابطة وهو على كرسيه كما انه تزوج وله عائلة... فسأله الاباتي:" وشو عندك ولاد". اجابه ايلي :" كتر خير الله يا سيدنا عندي صبي وبنت" انحنى الاباتي نعمان على ايلي وحضن راسه وطبع قبلة على جبينه وقال:" شو هالبطل انت يا ايلي العدرا تحميك، انت بطل حقيقي من ابطالنا وبنفتخر فيك". ثم نظر صوب المتحلقين الكثر وقال لهم : هيدا الشب مثال حي لشبابنا المؤمنين والمقاومين".

وسأل الاب الجليل اكثر من مرة عن صديقه العم يوسف اديب الرئيس السابق لبلدية ميفوق عندما دخل الى صالة الرعية التي شيدها اديب من ماله الخاص ... وامام نصب شهداء الكنيسة ال٤٢ والذي كانت تربطة صداقة ومعرفة بمعظمهم قال الاباتي ببسمة تحمل حسرة وغصة: "عا شوي كنتو حطيتولي اسمي بيناتن".

ودمعت عينا قدس الاباتي عندما توقف امام نصب شهداء حرب الاخوة العام ١٩٩٠ وردد اكثر من مرة اثناء قراءة الاسماء عبارة لا تدخلنا في التجارب المطبوعة فوق النصب ... ولفته اسم الشهيد المتطوع في الجيش نعمان بولس وقال : "الله يرحمو هيدا سميي" وسأل لماذا هناك اسمان باللون الاحمر؟ وغص محاولا حبس دمعه من جديد عندما شرحنا له ان الاسمين هما للشقيقين ريشار وفارس صليبي الاول في الجيش والثاني في القوات واستشهدا في الساعة نفسها فباول يوم من حرب العام ١٩٩٠ ... فاستدار الاباتي حانيا راسه مطلقا تنهيدة طويلة ومرددا " يا رب لا تدخلنا في التجارب".