شاركت رئيسة الكتلة الشعبية ميريام سكاف اهالي منطقة زحلة والبقاع اعتصامهم اليوم امام شركة كهرباء زحلة، بدعوة من "لجنة متابعة كهرباء زحلة 24/24"، مطالبة بتمديد الامتياز التابع للشركة مدة سنتين ورافضة العودة الى العتمة.
وفي هذا السياق خاطبت سكاف اهالي زحلة وقضائها، قائلة: "موقفنا هوي حّد ناسنا ومطروح ما بيقرروا .. بنكون وهالكلمة توجهنا فيها دعما للاعتصام امام شركة كهرباء زحلة:
"صباح النور، ووقفتنا هون ليضل صباحنا ومسانا نور
من سنين وجايي نحنا ونتغّنى بزحلة المدينة المستقلّة بتيارها
من سنين ونحنا بنشوف حالنا .. بنورنا
واليوم جايين يطفّوا هالنقطة الوحيدة المضيئة بين المدن
كنا بنتوقع من دولتنا انو تغار من نور زحلة .. والغيرة تخليها تشتغل ع حالها لتصير متّلنا
ويضّوي لبنان .. كل لبنان
بس ولا مرة توقعنا انو " نضيق بعينهن" ويستكتروا علينا النعمة الكهربائية .
ومن هون بنقلهن .. ما بدّنا نكون متلكن ..
انتو يلي لازم تكونوا ع صورتنا المشّعة
لوين آخدين البلد ؟ ولوين بدكن تاخدونا معكن ؟
هالمدينة مش لعبة بإيد اي جهة
زحلة فوق كل حساباتكن السياسية والمالية
ومش وقت يلي بدكن بتفهّمونا انو هون الصح
وقت يلي بدكن بيصير الصح غلط
اهل المدينة وقضاءها مش خاضعين للابتزاز السياسي
وبكل ثقة بيقولولكن : ما عنّا ثقة فيكن
وتجربتنا معكن بموضوع الكهربا بتحكي عن حالا
شو جايين تقدمولنا ؟
وما تخبرونا انو عنجد قلبكن عالتعرفة العالية
نحنا راضيين بما نحن عليه
صحيح بنتمنى انو التعرفة تنخفض
بس هون الناس عارفة حالها شو عم تدفع
اما معكن .. فالفاتورة غامضة ومش معروف لاي جيوب رح تروح
صرنا سنين بنجربكن .. وما سمعنا عن ملف الكهربا الا :
صفقات .. سمسرات ..ديون متراكمة .. بواخر ..وصرنا نتوسل الدول حتى تدينّا فيول .. وآخر شي شرعتّولنا الموتيرات
هيدي حلولكن ..
بدكن يانا نصدقكن ؟
رفعوا ايديكن عن هالملف ونحنا بالف خير
وبكلمتين تنين بنقلكن بضمير مرتاح : تركونا بحالنا
وما تصوّروا للرأي العام انو قلبكن علينا ..
قلبكن ع الاميتاز .. ع شي صفقة من هالصفقات
علمتونا انو انتو جماعة بتفكّر من جيبتها
فما تعملوا حسابنا معكن ..
وابعدوا عن زحلة كل مؤامراتكن بحجة مصلحة البلد
قولوها بشكل صريح : انو هيدي مصالحكن .
وشوفوا لوين وصلتونا ..
عم تعملوا منيح واحد معنا : انو خليتونا نكون كلنا صف واحد .. قلبنا ع مدينة بترفض انو ترجعوها للتقنين وزمن العتمة .
بيكفينا انو هالمدينة وقراها مهملة من قبل الدولة .. بيفكرّوا بكل شي الا بتعزيز انمائها
ونحنا اليوم مش جايين ندعم شركة .. جايين لدعم الشراكة
ووحدة الموقف بتبلش ع نور".
وغردت على حسابها عبر "تويتر"، بالقول: "من سنين ونحنا بنشوف حالنا بنورنا، واليوم جايين يطفوا هالنقطة الوحيدة المضيئة بين المدن".
وأشارت الى انه "كنا نتوقع من دولتنا انو تغار منا ويضوي لبنان كل لبنان، بس و لامرة توقعنا انو "نضيق بعينهن" ويستكتروا علينا النعمة الكهربائية".
وختمت "ما بدنا نكون متلكن، ومدينتنا مش لعبة بإيديكن".
من سنين ونحنا بنشوف حالنا بنورنا
— Myriam Skaff (@MyriamSkaff) November 12, 2018
واليوم جايين يطفوا هالنقطة الوحيدة المضيئة بين المدن
كنا بنتوقع من دولتنا انوتغار منا ويضوي لبنان كل لبنان
بس ولامرة توقعنا انو"نضيق بعينهن"ويستكترواعلينا النعمةالكهربائية
ما بدّنا نكون متلكن ومدينتنا مش لعبة بإيديكن#زحلة_عاصمة_النور#كهربا_24_24 pic.twitter.com/O40wkrAAUi
اشارة الى أن اهالي منطقة زحلة والبقاع نفذوا اليوم الاثنين اعتصامًا امام شركة كهرباء زحلة، بدعوة من "لجنة متابعة كهرباء زحلة 24/24"، مطالبين بتمديد الامتياز التابع للشركة مدة سنتين ورافضين العودة الى العتمة.
واحتشد أكثر من 10 الاف شخصاً، من شخصيّات سياسيّة، دينيّة، وإجتماعيّة والهيئات الإقتصاديّة، تقدّمهم رئيسة الكتلة الشعبيّة السّيدة ميريام سكاف، ميشيلين عقيص ممثلة بالنائب جورج عقيص، بالإضافة الى عدد من النواب السّابقين وهم طوني ابو خاطر، ايلي ماروني، وشانت جنجنيان، وممثل عن النائب السّابق نقولا فتوش، ومدير عام شركة كهرباء زحلة أسعد نكد.
الـــمــــزيــــــــــد
