جان بو جدعون يُهاجم بيار الضاهر: للصبر حدود.. والآتي أفظع!

هاجم الممثل جان بو جدعون كلّ من قناتي "الجديد" والمؤسسة اللبنانية للإرسال "LBCI" ممثلة بالشيخ بيار الضاهر، بعدما لم يتقاضَ ما يستحقه من أموال من المحطتين، بحسب ما قال. وكشف أنه لم يتقاضى أي شيء منذ شهرين وأكثر، بالرغم من أن المحطات تقبض ثمن الاعلانات سلفًا.

وهدد بو جدعون في رسالة كتبها عبر حسابه الخاص على موقع التواصل الاجتماعي "فايسبوك"، بأنه سيكشف المزيد من الامور التي ستكون أفظع مما كتبه.

وجاء في ما كتبه بو جدعون التالي:

"انما للصبر حدود... سؤال بتوجه في للشيخ بيار الضاهر lbc ولتلفزيون الجديد ممثلا بالمسؤولين فيه. ليش لمن بدكن يانا او عايزيننا بالاحرى، بتطوشونا تلفونات امتين بدكن تبلشو... بوقت بدنا اتعابنا يللي مش قابضينا من اكتر من شهرين وتلاتة واربعة؟!!! وبس نحنا نطالبكن بحقوقنا المادية يللي حضرتكن قابضين اعلانات الحلقات سلفا.. ومرتاحين ع وضعكن.. بتصيرو تشقدفو فينا.. كأنو كل واحد منا مليونير.. وعندو شركات مقاولة.. وبيديّن بالفايدة...؟؟ مش عيب عليكن يا محبين؟؟ مش عيب عليكن توعدونا كل جمعة وتكذبو...؟؟ مش عيب عليكن تفتخروا فينا على الشاشات.. وآخر شي اذا فاق ضميركن تتذكرونا...؟؟؟ مش عيب عليكن من فايدة فايدة الفايدة تقبضونا...؟؟ كيف بتقبلوا انو نحنا نتبهدل بوقت كل حقوقكن يللي طالبتوها منّا عم توصلكن ع الثانية وبلحظتها... طيب شو المطلوب يحمل جان بو جدعون صورة بيار الضاهر ويوقف ع الدورة مع ولادو ويقول للاعلان.. شوفوا هيدا يللي هاجم الوليد بن طلال ونعتو بالازعر.. طلع الحق مش ع الوليد بن طلال...؟؟؟

اسمعوني منيح... انا من الاشخاص بعّد وبطول بالي.. بس بألاخير عليّ وعلى غيري.. وما بسأل عن حدا بوقت يللي حقي مأكول وفي ناس عم تكذب عليي وتقدفني وتراوغ.. وما بعرف شو... يمكن ما بتعرفوني اني انسان صورتي كتير بشعة واعمالي كمان اذا في حدا عم يستغبيني..... وصدقوني.. شو عم بحكي... ما عم ذل.. ولا عم هين.. ولا عم بهدل حدا.... ولا عم هددكن.. ولكين انتو هيك بدكن.. هالموضوع صار بيخص عائلتي وليس عملي.. يعني لمن حقي عم تتناسوه وفي عندي واجبات عائلية تجاه بيي يللي بالمستشفى وتجاه اولادي التلاتة وواجباتي المنزلية... فما تلوموني شو بعمل.. ومش فارقة معي شي بتاتا... المتل بيقول ما تخاف من الازعر.... خاف من الآدمي.. اذا بتريدوا ما بقى حدا يزقفلي منكن عاللي بعملو.. مش عايز زقيفكن... عايز حقوقي المادية... واذا حاسين حالكن مكعورين رح اعملكن لميّة... من عند خوري بعرفو... وللتكملة تتمة افظع وبالتفاصيل اذا كملتو كذب...."

Select

Select

Select